✍️ കെ. എം. രാജൻ മീമാംസക്
വേദങ്ങളിൽ പ്രകൃതി സംരക്ഷണത്തിന് വളരെ പ്രാധാന്യം നൽകിയിട്ടുണ്ട്. മനുഷ്യനും പ്രകൃതിയും പരസ്പരം ആശ്രയിച്ചാണ് നിലനിൽക്കുന്നതെന്ന് വേദങ്ങൾ പഠിപ്പിക്കുന്നു. മരങ്ങൾ, നദികൾ, മലകൾ, ഭൂമി, വായു, അഗ്നി തുടങ്ങിയവയെ സ്നേഹിക്കാനും സംരക്ഷിക്കാനും വേദങ്ങൾ ആഹ്വാനം ചെയ്യുന്നു.
വേദങ്ങളിലെ പ്രകൃതി സംരക്ഷണ ആശയങ്ങൾ
പ്രകൃതി സംരക്ഷണത്തിനും പരിസ്ഥിതി സന്തുലിതാവസ്ഥയ്ക്കും ഊന്നൽ നൽകുന്ന ഏതാനും വേദമന്ത്രങ്ങൾ നോക്കാം.
- ഭൂമിസംരക്ഷണം
മാതാ ഭൂമി: പുത്രോfഹം പൃഥി വ്യാ: |
(അഥർവ വേദം 12.1.12)
ഭാവാർത്ഥം: ഭൂമി എന്റെ മാതാവാണ്; ഞാൻ ഭൂമിയുടെ പുത്രനാണ്. ഈ മന്ത്രം ഭൂമിയോടുള്ള സ്നേഹവും സംരക്ഷണബോധവും വളർത്തുന്നു. - ജലത്തിന്റെ മഹത്വം
ആപോ ഹി ഷ്ഠാ മയോഭുവസ്താ: ന ഊർജേ ദധാതന: | (ഋഗ്വേദം 10.9.1)
ഭാവാർത്ഥം: “അല്ലയോ ജലമേ! നീ സന്തോഷത്തിന്റെയും ജീവശക്തിയുടെയും ഉറവിടമാണ്; ഞങ്ങൾക്ക് ഊർജവും ക്ഷേമവും നൽകിയാലും. ജലസ്രോതസ്സുകളെ സംരക്ഷിക്കേണ്ടതിന്റെ പ്രാധാന്യം ഈ മന്ത്രം സൂചിപ്പിക്കുന്നു.
- യജുർവേദത്തിലെ ശാന്തിമന്ത്രം പ്രകൃതിയോടുള്ള ഐക്യം സൂചിപ്പിക്കുന്നു.
ദ്യൗഃ ശാന്തിരന്തരിക്ഷം ശാന്തിഃ പൃഥിവീ ശാന്തിരാപഃ ശാന്തിരോഷധയഃ ശാന്തിഃ।
(യജുർവേദം 36.17)
ഭാവാർത്ഥം: അന്തരിക്ഷത്തിൽ ശാന്തി ഉണ്ടാകട്ടെ. ഭൂമിയിലും ജലത്തിലും ഔഷധസസ്യങ്ങളിലുമെല്ലാം ശാന്തി നിലനിൽക്കട്ടെ. പ്രകൃതിയുടെ എല്ലാ ഘടകങ്ങളുടെയും സന്തുലിതാവസ്ഥയ്ക്കായുള്ള പ്രാർത്ഥനയാണിത്.
- സസ്യസംരക്ഷണം
വനസ്പതയ: ശാന്തി: |
(യജുർ വേദം 36.17)
ഭാവാർത്ഥം: വൃക്ഷങ്ങളിലും വനസ്പതികളിലും ശാന്തിയും ക്ഷേമവും നിലനിൽക്കട്ടെ. വനങ്ങളുടെയും സസ്യസമ്പത്തിന്റെയും പ്രാധാന്യം ഈ ആശയം വ്യക്തമാക്കുന്നു.
- സർവജീവജാലങ്ങളുടെയും ക്ഷേമത്തിന് പ്രാർത്ഥിക്കുന്നു.
മിത്രസ്യ ചക്ഷുഷാ സർവ്വാണി ഭൂതാനി സമീക്ഷന്താം | (യജുർവേദം 36.18) ഭാവാർത്ഥം: എല്ലാ ജീവജാലങ്ങളെയും ഞങ്ങൾ സൗഹൃദദൃഷ്ടിയോടെ കാണട്ടെ. ജീവജാലങ്ങളോടുള്ള കരുണയും സഹവർത്തിത്വവും ഈ മന്ത്രം പ്രബോധിപ്പിക്കുന്നു.
ഈ വേദമന്ത്രങ്ങൾ പ്രകൃതി ആദരിക്കപ്പെടുകയും സംരക്ഷിക്കപ്പെടുകയും ചെയ്യേണ്ടതാണെന്നും ചൂഷണം ചെയ്യേണ്ട വിഭവമല്ല എന്നും ഉദ്ഘോഷിക്കുന്നു. വേദങ്ങളിലെ പ്രകൃതി സംരക്ഷണ സന്ദേശം ഇന്നത്തെ പരിസ്ഥിതി പ്രതിസന്ധികളുടെ പശ്ചാത്തലത്തിൽ ഏറെ പ്രസക്തമാണ്. ഭൂമി, ജലം, വായു, വനങ്ങൾ, ജീവജാലങ്ങൾ എന്നിവയെ സംരക്ഷിക്കുന്നത് ഒരു സാമൂഹിക ഉത്തരവാദിത്വം മാത്രമല്ല, ധാർമിക കടമ കൂടിയാണെന്ന് വേദങ്ങൾ ഓർമ്മപ്പെടുത്തുന്നു. പ്രകൃതിയോടുള്ള ആദരവും സംരക്ഷണവും മനുഷ്യന്റെ നിലനിൽപ്പിന് അനിവാര്യമാണ്. ഈ പരിസ്ഥിതി ദിനത്തിൽ നമുക്ക് ആ പ്രതിജ്ഞ പുതുക്കാം.
🙏
കെ.എം. രാജൻ മീമാംസക്
ആര്യ പ്രചാരക് & അധിഷ്ഠാതാവ്
കാറൽമണ്ണ വേദഗുരുകുലം
& ലേഖരാം കന്യാഗുരുകുലം, വെള്ളിനേഴി